سواق أنا على ميكروباص
شغال أنا بهمه وحماس
طالع بناس .. نازل بناس
مأنا فى الأساس
سواق على ميكروباص
سواق من صعر سنى
وعربيتى حتّه منى
وأسبق الريح لكنى
بسوقها بإحتراس
سواق أنا على ميكروباص
رزقى على الطريق
قلبى م الخوف برىء
وبأدعى بالتوفيق
م المولى لكل الناس
سواق أنا على ميكروباص
لاكسرت فى يوم إشاره
ولاحتى أهل الحاره
صحيوا على الزماره
ماهى السواقه إحساس
سواق أنا على ميكروباص
أحب أكون خفيف
وسيرى دايما نضيف
حتى المزاج والكيف
مالهمش عندى أساس
سواق أنا على ميكروباص
ماليش صاحب لئيم
أصلى دوغرى وسليم
والراجل المستقيم
ينشال فى العين والراس
سواق أنا على ميكروباص
عيالى فى إنتظارى
صورتهم أهه قبالى
شايفهم طول نهارى
راجع ليهم خلاص
سواق أنا على ميكروباص ا/ محمد خميس حميده
ليست هناك تعليقات:
إرسال تعليق